mércores, 11 de decembro de 2013

O "swing" trasdezán

Denomínase swing ao movemento que realiza un golfista á hora de lanzar a bóla. Un par de traducións poderían ser péndulo ou oscilación, xa que é desta forma como se despraza o pao. Preguntarédesvos, a que vén isto?

O pasado mes de novembro aparecían varias noticias referidas ao proxecto de creación dunha escola e un campo de golf rústico no noso concello. Ao tratarse desta modalidade, no campo, situado nunha propiedade da Fundación Semana Verde de Galicia próxima a Rosende (a carón da ponte sobre a AP-53, en Guncín), non se realizarían grandes modifacións do terreo, respetando ao máximo a súa orografía. A escola estará situada nun solar a carón da Escola de Música da capital municipal e consistirá nun túnel para a práctica do golpeo. Ademais, este proxecto conta co apoio da Real Federación Española de Golf, así como da Federación Galega, incluíndo ademais a Silleda no programa "Golf na escola". Tamén se creou unha asociación para o desenvolvemento das actividades deste deporte.

E deixo unha pregunta no aire. De seguir adiante isto, chegará a competir o campo de golf da nosa parroquia con outros espallados pola xeografía galega e española?


xoves, 21 de novembro de 2013

Restos da Idade de Cobre

Sabiades que na nosa parroquia se atopou un obxecto datado hai preto de 5000 anos? Trátase dun pequeno machado de cobre, un exemplar dos inicios da Metalurxia, época correspondente á segunda metade do III milenio a. C., entre o Neolítico e a Idade de Bronce.

De dimensións reducidas, foi atopado probablemente a comezos do século XX no monte do Castañal por Antonio Rodríguez (seguramente cabeza da casa de Fernández de Casderrei). Tras pasar polas mans doutra persoa, foi parar á Sociedad Arqueológica de Pontevedra. En 1969 entrou a formar parte, xunto con outras pezas, da colección do Museo pontevedrés, onde se atopa a día de hoxe.




domingo, 3 de novembro de 2013

Cando Madoz puxo a Ponte no mapa

Foi entre 1846 e 1850 cando o político e estatista pamplonés Pascual Madoz publicaba o seu Diccionario geográfico-estadístico-histórico de España y sus posesiones de Ultramar, coñecido como Diccionario Madoz, unha obra de 16 tomos que recollía todos os lugares de España e das súas colonias. Entre eles, atópase o artigo relativo á nosa parroquia, no tomo 13, que di o seguinte:

"PONTE (SAN MIGUEL): feligresía en la provincia de Pontevedra (8 leguas), partido judicial de Lalín (2), diócesis de Lugo, ayuntamiento de Chapa; situada en la margen izquierda del río Deza; clima sano y templado. Tiene 32 casas en las aldeas de Ponte, Meijomence, San Miguel y Rosende. La iglesia parroquial (San Miguel) está servida por un cura de provisión en concurso. Confina el término con dicho río Deza y con las parroquias de Castro al NO, Silleda SO y Villar SE. El terreno es de buena calidad. Produce vino ligero, trigo, maíz, centeno, castañas, legumbres, frutas y pastos; y pesca de truchas, anguilas y otros peces. Población: 32 vecinos, 150 almas. Contribución: con su ayuntamiento."

Notas aclaratorias:
1-Ata 1853, o actual concello de Silleda levaba o nome de Chapa, coa capital na citada parroquia.
2-A igrexa parroquial á que se refire é a antiga, situada en San Miguel, xa que o cambio ao actual emprazamento se realizou en 1863. O San Miguel que aparece fai referencia ao patrón.
3-Con Rosende, fai referencia á parte pertencente a Ponte. A outra parte uniuse a esta parroquia en 1891.

mércores, 30 de outubro de 2013

Castañas por un tubo

Iso é o que lles espera a todos os que asistan o vindeiro sábado día 9 de novembro ao magosto de Ponte, organizado pola asociación veciñal A Trabe e que terá lugar no local social da parroquia. O menú consiste en panceta á brasa, castañas, viño e refrescos, ademais de café e chocolate quente. Se queredes pasar unha boa noite de outono en boa compañía, non dubidedes en apuntarvos.


domingo, 27 de outubro de 2013

Unha ollada ao cine de autor

Na noite de onte poñíase punto e final ás actividades organizadas pola asociación A Trabe neste mes de outubro que está a piques de rematar. Este final protagonizábao o filme "Tilda & Jean", escrito, dirixido e protagonizado por Darío Autrán. Hai que destacar que, entre o elenco de actores, atopamos a presenza de Ponte, da man de José Montoto Sanmartín, veciño do lugar de Trasfontao, e de Andrea Suárez Faílde, con familia no lugar de Casderrei.
De esquerda a dereita, Darío, Andrea e José antes da proxección.
A xente que onte se achegou ata o local social de Ponte puido ver unha película diferente ás que acostuma a haber nas carteleiras de calquera cine. Un filme que, en palabras do director, xa participou en varios festivais audiovisuais a pesar de ser un proxecto realizado con pouco presuposto. Só queda darlle a noraboa ao equipo encabezado por Darío Autrán por este magnífico traballo e que o futuro lles depare moitos exitos. Por último recordarvos que nos próximos días se anunciará a data do magosto parroquial, que correrá tamén da man da Trabe.

domingo, 20 de outubro de 2013

Unha noite con Disfunción Continua

Na noite de onte tivo lugar a representación de "Eran outros tempos, ou non?" da compañía teatral estradense Disfución Continua. Como era de esperar, a obra non defraudou e conseguiu facer saltar as bágoas coa risa. Noraboa ás actrices e actores desta compañía e que sigan por este sendeiro de bo traballo.

As de arriba son fotos de dous momentos da obra, que foron sacadas da páxina da compañía en Facebook (Disfunción continua teatro), onde podedes ver moitas máis da actuación de onte, así como doutras por diversos puntos da xeografía galega. Por último, non esquezades que o vindeiro sábado 26 ás 9 da noite terá lugar a proxección de "Tilda & Jean", no local social da nosa parroquia. Vémonos alí!

martes, 15 de outubro de 2013

Cine en Ponte

Trala música e o teatro, a asociación A Trabe tráenos cine. Neste caso, cine de autor coa película "Tilda & Jean" (2012) do director Darío Autrán. Este pontevedrés da xeración do 87 é ademais escritor, guionista e actor. De feito, protagoniza a película que veremos o próximo sábado 26 de outubro ás 9 da noite no Local Social de Ponte. (Tráiler)
Darío Autrán
Autrán é tamén creador do guión doutras obras cinematográficas como "Orxo", "Hydra" (estas incluídas dentro da "Trilogía de los Hilos" xunto con Tilda & Jean) ou "Hábitat". Tamén escribiu e protagonizou seis obras teatrais ademais de publicar un libro, titulado "Microrrelatos Insomnes". Segundo a critica, "Tilda & Jean" é un filme inquientante e que mantén aos espectadores en tensión continua. Teremos que comprobalo. E a próxima cita será seguramente arredor dunhas castañas. Vémonos!

domingo, 13 de outubro de 2013

Unha tarde de música

Onte celebrouse con grande éxito a segunda edición das Melodías de Outono. Centos de persoas achegáronse para ver actuar as bandas xuvenís de Silleda e Vilatuxe. En primeiro lugar, tocou a xuvenil lalinense interpretando pezas como Tercio de Quites, Ponteceso ou Mozos do penedo.
Banda Xuvenil de Vilatuxe
De seguido foi a quenda da xuvenil trasdezá, que interpretou Rúa da Fonte, Introduction & Modern Beat ou Ireland: Legend & Lore.
Banda Xuvenil de Silleda
Tras o concerto, os rapaces foron convidados a unha merenda. Finalizada esta actividade, toca poñer a vista na seguinte que organiza A Trabe: a representación de "Eran outros tempos, ou non?", a cargo da compañía Disfunción Continua Teatro, este sábado 19 ás 9 da noite. Vémonos alí!

martes, 8 de outubro de 2013

Eran outros tempos, ou non?

Este é o título da obra de teatro que a compañía estradense Disfunción Continua Teatro representará, grazas á asociación A Trabe, na noite do vindeiro sábado 19 de outubro no campo da festa de Ponte. Esta compañía creouse no ano 2011 e xa recorreron os escenarios galegos no 2012 con "Cóncavo Convexo". Neste verán estrearon a súa segunda montaxe, con moi boa acollida.

Compoñentes da compañía actualmente, de esquerda a dereita: Manu Mougán, Manuel Rosende, Alejandro Picallo, Natalia Carbajal, Sabela Magariños, Clara Iglesias, Jouse García (director), María Gaiteiro e María Porto.
"Eran outros tempos, ou non?" é unha comedia na que cinco mulleres que compartiron pupitres na súa infancia botan a vista atrás e recordan como eran aquelas clases en plena ditadura franquista. Moi recomendable esta función, polo que non tedes excusa para non acudir. Vémonos!

xoves, 3 de outubro de 2013

II Melodías de Outono

O vindeiro sábado 12 de outubro terán lugar por segundo ano as "Melodías de Outono", unha actividade da asociación A Trabe coa que trata de achegar a música de banda a esta parroquia, que tanto instrumentistas viu nacer. Na edición deste ano, contaremos coa presencia das bandas xuvenís de Silleda, que repite, e Vilatuxe. Celebrarase no campo da festa, en Tras do Sisto, baixo unha carpa, para que o mal tempo (se é o caso) non entorpeza a realización deste evento. Só nos queda disfrutar dunha agradable tarde de outono escoitando ás novas xeracións de músicos da contorna. Vémonos alí!

luns, 30 de setembro de 2013

Pasou o día e pasou a romaría

Deixamos atrás tres días de festa que se viron algo tapados pola choiva. Este elemento deslucíu a celebración das nosas patronais, obrigando a suspender os xogos do domingo. Pero a pesares disto, a festa seguiu adiante, non ten mediatizada como na edición do ano pasado, pero que estivo presente nas páxinas dos medios de comunicación comarcais.

-"O chourizo xunta a medio milleiro de persoas en Ponte"
-"Cando San Miguel deixou o seu lugar"

Agora, a esperar un aniño para volver disfrutar das festas en Ponte, pero as actividades aínda non remataron, xa que a asociación veciñal A Trabe organiza neste mes de outubro unha serie de actividades das que irei dando conta conforme se aproxime a súa realización.

venres, 27 de setembro de 2013

Imos de festa

Hoxe, como todos sabedes, comezan as patronais en Ponte coa Festa do Chourizo ao Viño. As prediccións non dan moi bo tempo para esta fin de semana, pero aínda así, seguro que son unhas grandes festas.

Por outra banda, sabiades que tal día coma hoxe hai dez anos tamén estabamos de festa? Así é. No ano 2003 as festas comezaban un sábado 27 de setembro e continuaban o día seguinte, o 28. Déixovos unha imaxe do programa daquel ano para que lle botedes un ollo.


E despídome desexándovos que pasedes unhas boas festas na compaña dos vosos.

xoves, 19 de setembro de 2013

Máis de dous séculos de Remedios

"1799. Ese é o ano ao que nos temos que remontar para atopar a orixe da romaría dos Remedios. Foi daquela cando catro veciños co lugar e couto xurisdiccional de Rosende dotaron con 12 ferrados de centeo anuais unha capela baixo a advocación de Nosa Señora dos Remedios. Conforme pasaban os anos, esta festividade congregaba a xentes dos arredores de Ponte, que ofrecían diversos obxectos que posteriormente se subastaban. Ademais, non faltaba a música, a cargo dun ou varios músicos, que podemos considerar como o xermolo da actual banda de Silleda.(...)"

Estracto do texto lido o 8 de setembro do 2013, festividade da Virxe, ante os devotos da mesma na igrexa parroquial de San Miguel de Ponte.


















Nas imaxes, tres momentos da procesión do día dos Remedios (8/9/13).

martes, 10 de setembro de 2013

Foi noticia...

Este ano xa é a cuarta edición, mais tal día coma hoxe presentábase a que ía ser un dos "Últimos coletazos gastronómicos" do verán. A Festa do Chourizo ao Viño abríase paso entre a variedade de festas gastronómicas da xeografía trasdezá. Acollida con bos ollos entre veciños e foráneos, superou os 500 comensais na súa edición do 2012 e esperemos que sexan máis na deste ano.



Ligazón á noticia: "Últimos coletazos gastronómicos"

xoves, 5 de setembro de 2013

O mes de Ponte

Regresan as publicacións deste blogue para botar a vista atrás no tempo. Desta volta, déixovos unha foto de Ponte tomada un par de anos antes da concentración parcelaria. Tan pronto como a vexades, moitos recordaredes como estaba aquilo.
Cal é o por que desta foto? Pois como ben sabedes, setembro en Ponte é sinónimo de festa. Neste mes celebramos as tres festas da parroquia:
- Comezamos o vindeiro domingo 8 coa festa da Nosa Señora dos Remedios.
- O día 22 terá lugar a festividade de San Verísimo, que noutrora tivo unha gran romaría na súa honra.
- E por último, a derradeira fin de semana son as festas patronais, que comezarán o 27 (venres) coa IV Festa do Chourizo ao Viño, e continuarán o 28 e o 29 honrando a San Miguel e á Virxe do Carme.
Así que non vos queda outra que vir. Vémonos.

luns, 8 de xullo de 2013

Un perigo evitable

Como xa saberedes, onte á tarde declarouse un incendio na parte oriental da parroquia, no seu linde con Vilar, no sitio coñecido como Monte da Costa. Ata alí desprazáronse medios aéreos e terrestres para tratar de conter e reducir un lume que ao parecer se orixinou no tendido eléctrico que pasa pola zona.
(Noticia no Faro de Vigo
Aínda se percibía o fume no lugar do incendio.
Ocorreu preto de Rosende, pero non estamos libres de que se produza un incendio en calquera outra parte do monte de Ponte, pois a maleza seca unida ás altas temperaturas e ao lixo que hai tirado polo noso monte son os ingredientes perfectos para que se dea outra situación coma a de onte. Esperemos que isto quede só en meras suposicións.

PD: na anterior publicación obviei a ponte da PO-205 sobre a vía do ferrocarril.

mércores, 3 de xullo de 2013

De ponte en ponte

Aínda que o seu nome se deba á desaparecida ponte da Insua, a parroquia de Ponte conta na actualidade con algo máis dunha ducia destas construcións, ben sexan pontes, viadutos ou pasos. Velaquí a recompilación:
- Sobre o río Deza: o viaduto da PO-205 (aínda que realmente xa está nos termos de Saídres) e a ponte do Pozo Negro.

- Tres pontes sobre o río da Mera en Rosende.
- O Pontillón, sobre o regueiro de Meixomence.
- Na AP-53, dúas pontes sobre ela (en Guncín e no Monte de Arriba), un paso por debaixo na saída e a que cruza a PO-205.
- Na vía, as pontes de Laxes e da Xaldiña/a Devesa e os pasos baixo ela en Suseixos e nas Regas.

Por pontes que non sexa!!!

martes, 11 de xuño de 2013

Agochado trala fonte

Situado moi preto da PO-205, atopamos o lugar de Trasfontao. Como se pode deducir polo seu nome, este deriva da posición con respecto a unha fonte, ben sexa a aínda existe fonte de Trasfontao (noutrora pública), ou ben a outra xa desaparecida.

Copyrigth 2013 Google
Os primeiros datos sobre este lugar son do século XV, nuns documentos de aforamento que fixo a Encomenda de Beade sobre os casais de Rey, Trasfontao e Numelle. Destacou mais tarde por ser o lugar de residencia da familia Conde. Os "Condes", como eran coñecidos a pesares de non posuír tal título nobiliario, fixéronse con amplas propiedades en San Miguel debido probablemente á redención de foros. Co paso dos decenios, foron saíndo herencias desta casa e os demais veciños foron adquirindo os seus terreos. Herencias coñecidas foron a de Vidal (que mais tarde vivían en Moalde), a de don Elías (emparentado cos Rivas de Sestelo, en Siador) ou a do Amigo. Os "Condes" abandonarían Ponte entre finais do XIX e comezos do XX, trasladándose á parroquia de Astureses, no concello ourensán de Boborás.

martes, 28 de maio de 2013

Adiós rios, adiós Ponte

Para despedir este mes de maio, déixovos este vídeo realizado polo noso veciño Manu Fernández, de Rosende. Coa letra de Rosalía e voz de Amancio Prada de fondo, ensínanos distintos sitios da contorna de Rosende, adecuándose á letra de "Adiós riós, adiós fontes", poema da poetisa de Padrón. A ver que vos parece. Pola miña parte, felicitar ao autor por este excelente traballo.



martes, 7 de maio de 2013

Sábado de cea

Como xa dixera anteriormente, o sábado celebrouse a cea organizada pola asociación veciñal A Trabe. Arredor de 80 persoas, entre maiores e nenos, encheron as instalacións do local social da parroquia, polo que se pode considerar un éxito de participación. Deixovos dúas instantáneas da cea e o resto podédalas ver na conta de Facebook da Trabe: http://www.facebook.com/asociacionatrabe.deponte



Parabéns aos organizadores e que a próxima sexa igual de boa ou mellor.

xoves, 2 de maio de 2013

Cea de maio

Despois dun inverno chuvioso, parece que agora chega o bo tempo. E por iso en Ponte celebrarémolo ceando no Local Social este sábado día 4. Esta iniciativa, organizada pola asociación veciñal A Trabe, tratará de reunir a veciños da parroquia, xente nacida nela e que vive fóra e a todo aquel que lle apeteza pasar unha boa noite de maio na compaña das xentes de Ponte. Ideas coma esta danlle vida á parroquia e fan que se manteña unida. Se vas/ides acudir, de seguro que pasaredes unha boa velada. Vémonos alí.

luns, 29 de abril de 2013

O PXOM cambia a ponte de sitio

Como ben sabedes, estase a tramitar o PXOM de Silleda, que xa foi exposto ao público e calquera pode acceder á documentación na web do concello. Unha vez que saiu á luz, viuse que tiña algúns erros, que era conveniente subsanar. No tocante á parroquia de Ponte, o máis claro era o intercambio de nomes entre Trasdosisto e Trasfontao. Pero hai que destacar un que pasou desapercibido. Trátase dun erro no catálogo patrimonial que rexistra o PXOM, que sitúa a antiga ponte da Insua, a que deu nome a esta parroquia, a carón do actual viaduto da PO-205, e polo tanto aparece rexistrada en Saídres.

Nesta ligazón (http://silleda.es/PXOM/Parroquias/28%20Sa%EDdres/Cat%E1logo/2810.pdf) podedes ver que na descrición se argumenta que non se puido localizar os restos da mesma. Isto é lóxico, pois os restos (de atoparse) estarían a uns 600 metros río arriba, na Insua. Non sei cantos erros coma este haberá no proxecto, pero deberíanos arranxar.

mércores, 17 de abril de 2013

Ponte en Google Maps

Desde hoxe, a aplicación Google Maps permite visualizar o nome de todos os núcleos de poboación de Ponte, pero lamentablemente non se poden ver todos á vez, polo que se buscades Ponte, Silleda na ligazón
https://maps.google.es/, teredes que xogar co zoom para ver todos os nomes.

Este feito fíxose realidade grazas ao feito de que Google está mellorando esta aplicación e outras relacionadas con elas, para atopar os lugares máis facilmente. Así e todo, aínda ten fallos, que dos que calquera pode avisar premendo na esquina inferior dereita en "Notificar un problema".

venres, 5 de abril de 2013

Vertedoiros incontrolados

Desde hai un tempo, observei que nunha serie de puntos situados nas proximidades da vía do ferrocarril, en San Miguel, foran arroxadas importantes cantidades de lixo: materiais de obra, restos vexetais, vidro, neumáticos...



Estas fotos corresponden aos restos vertidos na Xaldiña, cerca da ponte sobre o ferrocarril. Próximos a este lugar, en Suseixos e a carón da vía, atópanse unha morea de botella de vidro verde, indicativo de que contiñan viño.

Mais ao norte, no terraplén de Laxes, tamén tiraron no seu momento material de obra e outros refugallos, e no fondo do Coto do Outeiro tamén baleiraron remolques de lixo.

Outros puntos da nosa parroquia que foron vítimas destas accións son a escombreira de Tras do Agro, en Rosende, onde tamén tiraron material de obra, entre outras "lindezas"; ou o camiño próximo ao Coto da Penanegra, no lindeiro da parroquia con Silleda, O Castro e Margaride. Neste último lugar tamén tiraron refugallos e seguírono facendo sen respectar o sinal de prohibición alí colocado.

Estas accións dan unha mala imaxe de nós e da nosa parroquia, aínda que moitas veces sexa xente doutros lugares quen leva a cabo tales vertidos.

luns, 1 de abril de 2013

Incoherencias da PO-205

Fai un tempo, colocaron uns sinais indicadores a carón da PO-205, a estrada que une Silleda con Vila de Cruces. Neles aparece a distancia desde o lugar onde os colocaron a cada un dos núcleos urbanos antes citados. O que me chamou a atención foi a falta de coherencia das cifras dos quilómetros. Explícovos: nos primeiros, localizados na Chanca, na intersección desta estrada coas pistas procedentes do Castro e de Vilar, pon que Silleda se atopa a 3 km, mentres que a distancia con Vila de Cruces é de 12 km; mentres, os segundos, colocados no cambio de sentido en Trasdosisto, sinalan que Silleda dista 3 km e a capital cruceña  se atopa a 11.5.



Quere dicir isto, que conforme nos aproximamos a Vila de Cruces, Silleda séguese mantendo á mesma distancia de nós? Este é un fallo que se debería subsanar. Como? Pois poñendo na chanca que Silleda se atopa a 2.5 km, xa que no outro lugar é correcto o dato, pois nas proximidades se atopa o punto quilométrico 3. Esta é miña humilde opinión.

martes, 19 de marzo de 2013

O Puzo Negro (III)

Fago esta publicación para comunicarvos que a Ponte do Puzo Negro xa ten un artigo na Galipedia, a Wikipedia en galego. Como xa sabedes, o Puzo Negro é un lugar con moitas historias e de gran beleza paisaxística, de agradable visita na época estival.



Podedes botarlle un ollo ao artigo nesta ligazón:
http://gl.wikipedia.org/wiki/Ponte_do_Pozo_Negro

mércores, 13 de marzo de 2013

Eleccións en Ponte

Na noite de onte celebráronse en Ponte as eleccións ao consello parroquial, que representará á parroquia ante o Concello. Velaquí os resultados.
- Tomás Salgueiro: 4 votos
- Pablo Santomé: 2 votos
- José Castro: 2 votos
- Luís Ferradás: 1 voto
- Juan Carlos Seijo: 1 voto
- Diego Frade: 1 voto
Ademais houbo un voto nulo, co que o total foi de 12 votos. Así que o consello queda constituído por Tomás como presidente, e Pablo e Pepe terán que decidir que será vicepresidente e quen vocal. Noraboa aos elixidos.

martes, 26 de febreiro de 2013

Unha cuestión de lindes

A construción das instalacións da Feira Internacional de Galicia no sur da nosa parroquia, no límite coa parroquia de Silleda, deu pé a que a poboación de Silleda (concello) pense que a totalidade deste recinto foi edificado na parroquia de Santa Baia. Pero isto non é así. Atendendo a razóns históricas, o linde entre Ponte e Silleda transcorre a través deste recinto, de leste a oeste, coincidindo case coa dirección marcada pola pista que une Rosende con Silleda, que termina no medio da Costa de Outeiro. Está claro que se seguimos esta liña, a Ponte corresponderíalle o lugar das Casas do Monte, pero este pasou no século XIX a depender da parroquia veciña. Nembargante, o resto do lindeiro permaneceu igual ata o de agora.

Vista aérea da zona. Copiright: Digitalglobe 2013
Valla como proba das miñas verbas unha anécdota sacada da tradición oral de Ponte. Sucedeu entre finais do XIX e comezos do XX. Un veciño da nosa parroquia falecera na de Silleda e, como era costume no caso de traslados de defuntos por varias parroquias, varios homes de Silleda levaban o cadaleito precedida pola cruz parroquial en mans do sancristán. Ao chegar ao linde na Costa de Outeiro, onde esperaban os de Ponte, o sancristán de Silleda fixo amago de querer deixar atrás a estes e continuar uns metros máis, pero o sancristán de Ponte paroulle os pés. Este argumentou que xa chegara ao estremo, mentres que o primeiro, sorprendido, creu que o límite era máis adiante. Unha vez se pasaron a caixa, abandonar ningún dos homes de cada lado os terreos da súa parroquia, botaron a andar cara a igrexa de Ponte, non sen antes comparar o sancristán de Ponte a nosa cruz parroquial coa de Silleda (ao parecer de peor calidade).

Quero dicir con isto que, á hora de trazar os límites parroquiais, se atenda á historia dos mesmos, así como á tradición popular, xa que é esta a que nos aporta suficientes datos coma para que non nos equivoquemos.

martes, 5 de febreiro de 2013

Onde o mundo se chama Casderrei

Situado na parte centro-norte da parroquia, atopamos o lugar de Casderrei. Os primeiros datos sobre este núcleo sacámolos dos foros da Encomenda de Beade sobre as terras desta parroquia, onde se menciona a existencia do casal de Rei, o casal de Trasfontao e o casal de Numelle, todo isto alá polos séculos XV e XVI. Mais tarde volve mencionarse no Catastro de Ensenada, do que xa falarei varias veces, destacando que neste lugar vivían un perito ou "agrimensor" e un arrieiro, entre outros.
Vista aérea. Copyright: Geoeye 2013
Por último, pódese salientar a súa proximidade á estrada PO-205, así como a existencia de dúas fontes neste lugar: a Fonte da Nugalla, hoxe desaparecida, e a Fonte de Outeiro, da que mana o rego da Regueira, afluente do Deza.

luns, 4 de febreiro de 2013

Puenting

Xa falara disto no mes de outubro, cando unha das concursantes do programa "O clan dos impostores" o practicara, pero de novo volve ser noticia a práctica do puenting no viaduto da PO-205 sobre o Deza.
Aquí vos deixo a ligazón para que leades a noticia:

http://www.farodevigo.es/portada-deza-tabeiros-montes/2013/02/03/salto-vacio-silleda/751626.html